CAGAYAN DE ORO CITY-Gipamugos ni Commission on Elections o Comelec 10 regional director Atty. Renato Magbutay nga ang Bukidnon ug pipila ka lugar sa Misamis Oriental ang angayan hatagan sa daghang tropa sa PNP ug AFP alang sa 2019 midterm election sa nasud.
Kini ang reaksyon ni Magbutay sa paglakip sa Cagagayan de Oro isip election hotspot sa nasud.
Miingon si Magbutay nga kon lantawon ang mga basehan sa angayan nga ibutang sa hotspot,mahimong ilakip niini ang Bukidnon ug pipila ka bahin sa Misamis Oriental apan dili ang dakbayan.
Samtang supak si City Mayor Oscar Moreno nga magpadayon nga mabutang nga hot spot ang dakbayan sa 2019 midterm elections.
Miingon si Moreno nga wala sukad nga dunay dagko ug dugu-ong hitabo nga naglambigit sa politika sa dakbayan.
Kini ang hinungdan nga naglaom si Moreno nga mawagtang sa PNP ang pagpaubos sa Cagayan de Oro isip usa sa mga hot spot nga lugar sa Pilipinas ning tuiga.
Si Moreno ang namulong alayon sa Unity Walk, Peace Prayer Rally ug Covenant signing sa syudad.
Samtang nagpatigbabaw ang delicadeza ni Gov Bambi Emano alayon usab sa Unity Walk, Peace Prayer Rally ug Covenant signing sa lalawigan.
Kini human gibalibaran ni Emano nga mohatag sa welcome remarks nga gihangyo kaniya sa Comelec sa probinsya kagahapong sa buntag.
Miingon ang gobernador nga dakong pagpamintaha kaniya nga mohimo niini kon walay gitahas nga papel ang kaatbang niini sa politika rason nga mibalibad kini sa maong gimbuhaton sa lalawigan.
