CAGAYAN DE ORO CITY – Gimatud-an sa interim management sa Cagayan de Oro Water District o COWD nga bakak ug malisyoso ang mikatag nga spliced video footage diin gipatoo sa mga kritiko nga dunay lungkab nga nahitabo sa data center room gamit ang job order sa city hall sa miaging semana.
Kini human gipasaksihan sa nagkadaiyang media outlets ang COWD board of directors room nga nagsilbing temporaryong opisina ni interim COWD General Manager Fermin Jarales sulod sa unom ka bulan.
‘Sa aktuwal nga pagsusi sa mga sakop sa prensa, unta matul-id na ang mga impormasyon nga dunay gipatoo nga lungkab sa akong kaugalingong opisina.’
Miingon si Jarales nga sa maong buhatan nahimutang ang BoDs board resolutions nga dili basta-bastang mahilabtan samtang gitinguha pa masulbad ang mga suliran nga giatubang sa COWD.
Siya miingon nga pila pa ka metros gikan sa ensaktong lokasyon sa general manager’s office ayha masudlan ang buhatan sa COWD-BoD.
Gipasabot niini nga dako’g kalainan ang aktuwal nga COWD general managers ‘office nga kanhi gi-okupahan ni Engr. Antonio Young nga iyang gipulihan kaysa BoDs office.
Gihinaut ni Jarales nga tungod sa napakita sa media sa tinud-anay nga estorya unta malamdagan ang katawhan ug matul-id ang mga bakak nga mugna sa ilang mga kritiko.
