CAGAYAN DE ORO CITY – Dili palabyon ug manubag sa liderato sa Catholic Bishops Conference of the Philippines kadtong mga obispo nga hilom tig-dawatan sa mga donasyong salapi gikan sa mga kompanya nga utok pagguba sa kinaiyahan.
Kini ang pagpasabot ni CBCP president ug Caloocan City Archbishop Pablo David,D.D sa gilugwa nila nga resolusyon kabahin sa kasamtangang kahimtang sa kinaiyahan sa nasud.
Miingon si David nga estoryahon usab nila ang ilang investment partners nga dunay atraso sa kinaiyahan nga sila mo-distansya na tungod sa baruganan sa simbahan.
Tipik sa pondo sa simbahang Katolika ang gigamit nila sa investment partnership sa mga kompanya,industrisya ug ubang financial institution aron modako ug dunay dugang magamit sa pagsilbi sa katawhan.
Samtang dalaygon ang baruganan sa simbahan apan kulang sa bilib ang grupong Citizens Watch for Good Governance 10 nga dunay tinud-anay nga ngipon sa ilang gisaad nga proteksyon sa kinaiyahan.
Gitumbok ni CWGG 10 convenor Atty. Antonio Soriano ang sulti sa CBCP nga dili na mobubo’g pamuhunan kuyog ang mga kompanya nga utok paggusbat sa natural nga rekurso sa nasud.
Dili usab kumbinsido si Soriano nga molikay na ang taga-simbahan sa pagdawat mga donasyong-salapi nga gikan sa mga korporasyon nga utok sa illegal environment activities.
