“Dapat isa lang”.
Kini maoy sugyot nga gisuportahan sa NAMFREL o National Citizens’ Movement for Free Elections nga mahimong lig-ong probisyon sa ipatumang Anti-Political Dynasty Law.
Sa exclusive interview sa BOMBO RADYO, miingon si Nestor Banuag Jr, Coordinator sa NAMFREL Misamis Oriental Chapter nga nagtinguha ang ilang pundok nga paduso kini nga probisyon aron makita ang tinuod ug epektibong Anti-Political Dynasty Law sa nasud.
Alang kang Banuag, ang kampanya naglatid nga usa ra ka miyembro sa pamilya ang tugotan nga molingkod sa usa ka national elective position ug usa ra usab sa local elective position sa managsama nga election period.
Una niini, gipagula sa Catholic Bishops’ Conference of the Philippines (CBCP) ang ilang posisyon nga ang political dynasty dili lamang usa ka isyu sa politika apan usa usab ka moral ug ethical nga kabalaka tungod kay kini nagtapok sa gahum ug naglimit sa oportunidad sa ubang kwalipikadong Pilipino.
Gumikan sa nagkakusog nga panawagan, bisan ang Supreme Court misugo sa Kongreso nga ipasa na ang balaod batok sa political dynasty human sa kapin 39 ka tuig nga wala kini matuman.
Ang coalition nga nagdala sa “Dapat Isa Lang” nagtinguha nga makakuha sa pirma gikan sa 10% sa registered voters sa nasud aron mapasar ang balaod pinaagi sa people’s initiative.
