Alerto ang City Price Coordinating Council ug Department of Trade and Industry (DTI) sa pagmonitor sa mga tindahan ug patigayon nga musakay sa panahon, ilabe sa holiday rush.
Namahayag si Atty. Jose Edgardo Uy, nga gipaniguro nila nga walay mga konsumante nga ma-abusaran pinaagi sa ilegal nga pagpa-usbaw sa presyo sa batakang palaliton lakip na ang mga naglangkob sa noche buena food packs.
Gawas niini, gitutukan usab sa grupo ni Uy ug sa Department of Health (DOH), ug Food and Drug Administration (FDA) ang presyo sa tambal nga sagad halinon sa holiday season.
Aron ma-alerto ang publiko sa tikas-presyo, nagpagula sa educational campaign ang ilang han-ay aron masayud ang publiko sa iyang katungod, dungan ang regular ug suprise nga pag-inspeksyon sa mga patigayon.
Usa sa gihimong pananglitan ni Uy ang pagsusi sa mga baratohon ug kadudahang kalidad sa mga Christmas Lights, kay dili kini luwas gamiton, may tsansa pa nga mahimong hinungdan sa dakung sunog panahon sa selebrasyon.
Dugtong niini, nanawagan ang opisyal sa mga mamalitay nga kung gusto nila’g discounted price sa mga palaliton, mamahimo silang mubisita sa diskwento Caravan sa DTI, sunod tuig.
Co-writers: James Oliver
