Gipahinumdoman ni Ryan Blanco, DRRM Head sa Department of Education (DepEd) sa Cagayan de Oro City, ang mga ginikanan nga ang pagsuspinde sa face-to-face classes gitumong aron mapanalipdan ang mga estudyante batok sa grabeng kainit sa panahon.
Matod ni Blanco, importante nga malikayan sa mga bata ang dugay nga pagkaladlad sa init sa adlaw aron dili maapektuhan ang ilang panglawas.
Bisan pa man og dili hingpit nga mapugngan ang mga bata sa pagdula, giawhag niya ang mga ginikanan nga bantayan sila ug likayan ang pagdula sa mga lugar nga direktang naigo sa init sa adlaw.
Gipasabot usab niya nga bisan ganahan ang mga bata nga magdula sa gawas, kinahanglan gihapon nga unahon ang ilang kaluwasan.
Tumong sa maong lakang nga malikayan ang mga sakit nga mahimong hinungdan sa pag-absent sa mga estudyante.
