Gipanguluhan ni Presidente Ferdinand Marcos Jr ang Philippine Military Academy (PMA) ‘Talang Dangal’ Class of 2026 commencement exercises sa Fort General Gregorio H. del Pilar sa Baguio City.
Ang iyang mensahe nagbilin sa bug-at nga hagit alang sa mga graduado nga musulod sa pagserbisyo sa gobyerno, isip mga bag-ong sakop sa Airforce, mga Navy ug sa kasundaluan sa Philippine Army.
Gipadumdum sa presidente ang pagpuyo sa kinabuhi nga puno sa integridad, disiplina, ug dungog.
Ning tuiga, ang ‘Tagapagtanggol ng Lahing Dakila at Marangal’ (Talang Dangal) Class adunay 207 ka gradwado, 142 lalaki ug 65 babaye; 76 niini mosulod sa Philippine Army, 62 sa Philippine Air Force, ug 69 sa Philippine Navy.
Sa sinugdan, 37,651 ang nag-aplikar apan 1,211 lamang ang nakapasar sa eksaminasyon ug nakasulod sa hagit nga pagbansay nga naglangkob sa modernong warfare, territorial defense, data analytics, ug ubang espesyal nga larangan.
Gitapos sa presidente ang iyang panawagan sa mga graduadong kadete nga puy-an ang pagserbisyo sa gobyerno nga nagsumikad sa Honor Code sa akademya.
Kini naglangkob sa dili magbakak, dili manglimbong, dili mangawat, ug dili motugot sa bisan kinsa nga mobuhat niini.
