CAGAYAN DE ORO CITY – Mitala na sa 48 ka kinabuhi sa tawo ang kompirmadong nakalas sa pagtakboy sa sakit nga dengue nga dala sa mga nakapaak nga lamok palibot sa Northern Mindanao region.
Kini subay sa gilugwa nga impormasyon sa Dept of Health 10’s Center for Health Development Northern Mindanao kabahin sa maong sakit nga kaylap sa rehiyon sugod Enero 1 hangtod 21 sa Hunyo ning tuiga.
Gibutyag ni Gemma Uy,program manager sa DOH-CHDNM nga sa maong mga bulan anaa sa 6-mil 884 ka kaso sa dengue ang natala gikan sa lima ka probinsya sa rehiyon nga naglakip sa nag-unang mga dagkong syudad ug kalungsuran.
Siya miingon nga sagad sa mga grabeng apektado sa balatian ang kabataan nag-edad 5 hangtod 9.
Kabahin sa mga dunay tag-as nga kaso ang Ozamiz City nga mitala sa 575;Iligan City,501;Valencia City,453;Cagayan de Oro City,410; Tangub City,245;Oroquieta City,228;Malaybalay City,166; Plaridel,167 ug Jimenez,157.
Sa ihap sa usab sa mga namatay’ng pasyente sa dengue infection,pinakadaghan ang Misamis Occidental kay anaa sila sa 19; Bukidnon,9; Lanao del Norte,8; Misamis Oriental,6;Iligan City,4;tag-usa sa Cagayan de Oro ug Camiguin.
Mipasidaan ang ahensiya nga batasunon ang kalimpyo sa palibot aron dili pondohan sa mga lamok nga modala sa dakong kalautan sa kinabuhi sa kabataan ug bisan sa mga edaran.
