Gitin-aw sa Department of Justice nga ang pagpagawas sa subpoena dili nagpasabot nga otomatiko nang guilty ang usa ka respondent sa maong reklamo.
Matud ni Department of Justice (DOJ) Undersecretary Ian Norman Dato, ang gipagawas o gi-issue nga subpoena kay bahin lang sa ‘preliminary investigation stage’ sa panel of prosecutors sa reklamanong ilang gihawiran, diin diri gitagaan og higayon ang mga respondents sa pagtubag sa mga alegasyon batok kanila ayha kini mupadalong sa hingpit nga pagpasaka sa kaso batok kanila.
Mahinumdoman nga nagmando ang DOJ ngadto kang Senador Robin Padilla, Lt. Col. Jean Robles ug sa uban pang mga indibidwal nga moatubang sa panel of prosecutors aron magsumiter sa ilang counter-affidavits nga adunay lakip nga mga ebidensya.
Dugang niini, giatubang sa maong mga indibidwal ang reklamo nga ‘obstruction of Justice’ nga may kalabutan sa pag-ikyas ni Senador Ronald “Bato” dela Rosa atol sa implementasyon sa Warrant of Arrest nga nagagikan sa Internation Criminal Court (ICC) tungod sa kalambigitan niini sa “War on Drugs” ni kanhi Presidente Rodrigo Duterte nga kasamtangang nag-atubang sa 3 ka ihap sa kasong crime against humanity.
Gikatakda nga ipahigayon ang pagdungog sa panel sa petsa 25 karong bulana ug petsa 9 sa bulan sa oktubre, sa Alas dos sa hapon sa Department of Justice, diin gipasalig sa ahensya nga resolbahon ang maong kaso nga walay gidapigan ug gipaboran nga bisan unsang posisyon sa mga partido. (raniel mahunyag)
