CAGAYAN DE ORO CITY – Papha sa trabaho ang dangatan sa mga pulis nga makit-ang positibo paggamit sa ilegal nga droga nga naggikan sa Misamis Oriental Provincial Police Office Headquarters sa lungsod sa Villanueva ning lalawigan.
Kini human sorpresa nga gipaubos sa mandatory drug test ang dul-ag 200 ka pulis diin nag-una niini si Misamis Oriental PNP Director Police Col Rolando Destura.
Miingon si Police Lt Princess Joy Enriquez,tigpamaba sa Misamis Oriental PNP nga gilayon isunod sa PNP Crime Laboratory 10 ang mga matag-estasyon pagsiguro nga masumpo ang pagsulod sa ilegal nga droga mismo mga pulis sa probinsya.
Dugang ni Enriquez nga masaligon sila nga unta walay mag-positibo sa ilang mga pulis nga naggamit sa shabu kay pagkatangtang sa trabaho ang naghulat usab ngadto kanila.
Nasayran nga nagsumikad ang mando sa Camp Crame nga gitahasan pagpatuman ang Camp Alagar diin nakabase ang Police Regional Office 10.
