CAGAYAN DE ORO CITY – Gisuroy pinanguluhan ni Tourism Secretary Christina Frasco kuyog ang pipila ka foreign dignataries ang tourist spots nga makita dinhi sa syudad ug Bukidnon sugod kagahapong adlawa.
![](https://img.bomboradyo.com/cdo/2024/05/FRASCO-9.jpg)
Kini alayon sa gihingusgan nga DoT’s Philippine Experience Program diin mismo ang local ug foreign visitors ang ipasinati sa kanindot sa mga talan-awon ug kainit sa pag-atiman sa katawhan sa matag-lugar.
Miingon si Frasco nga ganahan siya’g balik-balik dinhi sa Northern Mindanao ilabina sa Cagayan de Oro tungod sa talagsaong pagtagad nga gipabati sa katawhang nanimuyo niini.
Kabahin sa giduaw sa foriegn dignitaries ug DOT stakeholders ang mga antik ug ubang talasaong mga kabilin sa unang Cagay-anons ug Misamisnons nga naka-deposito sa museleo sa Xavier University ning syudad;gisundan sa pagdalikwat nila sa forest adventure park sa Dahilayan sa Manolo Fortich;pakighimamat sa pito ka managlahing tribu nga anaa luyo sa tinuig nga sundayag sa Kaamulan Festival sa Malaybalay;pag-adto sa Lake Apo sa Valencia City ug pakighimamat sa katawhan sa Kitaotao ayha lahos sa Davao City.
Nag-unang tuyo ni Frasco sa pagdani sa mga langyaw’ng foreign embassy officials nga putlon na ang ‘stigma’ nga grabe ka gubot ug peligro sa mga turista ang Mindanao.
Kini na ang ikatulong pagbalik ni Frasco sa rehiyon sulod ning tuiga.