CAGAYAN DE ORO CITY – Halos di pa gihapon makatoo ang 46 anyos nga ginang nga kugihan nga partisipante sa mga promo nga gilusad sa Bombo Radyo Philippines nga siya ang ika-73 nga milyonaryo ning tuiga.
Kini ilabina nga nag-atubang sa dakong hagit sa nasud tungod sa epekto sa pandemya diin hagba ang ekonomiya dala sa COVID-19.
Kini human hingpit nang nadawat ni Gng Mercil Daguing nga taga-Barangay Rosario,Tagoloan,Misamis Oriental ang mitaginting nga usa ka milyon ka pesos nga cash prize isip grand draw winner nga ika-16 ka tuig nga Buena Mano Salvo Promo sa Bombo Radyo ug STAR FM nga gihimo sa miaging Hunyo ning tuiga.
Gibutyag ni Daguing sa Bombo Radyo nga dako nang tabang alang sa iyang pamilya ang nadag-an nga premyo sa promo ilabina nga minilyong partisipante ang miapil tungod sa kalisod sa sitwasyon sa nasud.
Miingon si Daguing nga gamiton niya ang daug nga pangdugang-kapital sa iyang negosyo ug paggasto sa mga anak niini nga nagtungha.
Gipasalamatan sa ginang ang Bombo Radyo Philippines kauban ang trade sponsors tungod sa talagsaong higayon nga nalusad ang multi-million promo diin siya nabunutan nga gikan sa Northern Mindanao.
Giimbitar niini nga unang migamit sa proof of purchase sa Energen isip winning entry ang mga tigpaminaw sa Bombo Radyo ug Facebook pages followers nga sundon ang iyang tunob nga kugi moapil ug mohimo sa entries aron usa kanila ang mosunod nga modaug sa mga dagkong premyo.
