CAGAYAN DE ORO CITY – Kasuhan ni DSWD Secretary Erwin Tulfo ang grupo sa mga sindikato nga utok sa pagpangilad sa libuang pamilyang Pilipinhon diin kini naka-kolekta na’g 15 milyones pesos nga bayad aron maka-avail sa mga programa sa ahensiya sama sa 4Ps.
Gibutyag sa kalihim nga gusto niini nga kasong large scale estafa ang ikaso batok sa grupo ni John Carl Mendoza alyas Jay Lagrimas nga taga- Cavite nga mituyo lama’g anhi aron ilaron ang daghang pamilya sa pipila kabarangayan dinhi sa dakbayan.
Si Tulfo miingon nga wala pa’y labot niini ang kasong usurpation of authority ug falsification of public documents nga atubangon sa maong mga sindikato.
Si Mendoza nga nagtoo nga empleyado sa DSWD-NCR ang nadakpan sa entrapment operation sa gisak-an niini nga balay sa Villamor Compound,Brgy Balulang ning syudad.
Gawas kang Mendoza nga naka-kulekta na’g 1.3 milyon pesos sa iyang pagpangilad sulod sa upat ka tuig,apil sa gipangita sila Henry Saguiwalo;Arcelli ug Bebot Agustin,Robert Mejas ug Shane Acedera nga mokabat na sa 14 milyones ang na-kolekta sa mga tawo.
Modus operandi sa grupo nga mangayo’g bayad nga 500 pesos aron mahimong miembro sa 4Ps program ug laing 300 pesos para makakuha’g pondo sa Special Ameleoration Program o SAP.
Samtang gihagit ni DSWD 10 regional director Mari-Flor Dollaga ang ubang mga biktima sa modus operandi sa ni Mendoza nga molugwa aron mapun-an ang mga kaso nga atubangon nila sa korte ning syudad.
Kini human unang nakatala ang ahensiya sa 150 ka reklamante nga gipangayua’g bayad ni Mendoza gikan sa pipila ka brgy bugti sa pasalig nga mahimong miembro sa 4Ps program.
Miingon si Dollaga nga hangtod nga dili mo-kooperar ang ubang nagsilbing mga biktima,dili usab mahatagan sa hustisya ang buluhisan sa katawhan nga gigamit nga pondo sa pagtabang sa mga pamilyang nanginahangla’g tabang.
