(Update) CAGAYAN DE ORO CITY – Gihimakak ni interim Cagayan de Oro Water District General Manager Fermin Jarales nga gilungkab niya ang kaugalingong opisina niini.
Sumala sa iyang gilugwa nga pahayag nga namantala sa social media,grupo ni acting regular COWD General Manager Engr Edna Najeal ang mihimo sa pagpanglunkab sulod sa buhatan niini kagahapong adlawa.
Miakusar si Jarales nga pugsanon daw nga gisulod sa grupo sa regular mngt aron kuhaon ang mga importanteng mga dokumento ug bisan mga papeles kabahin sa gipasaka nila nga kaso batok ni Najeal.
Dugang ni Jarales nga nalisang daw si Najeal sa mga nadiskobrehan sa interim officials rason nga naghinobra ang maniobra aron maluwas ang mga kaugalingon niini.
Subli giila sa interim officials ang hukom ni kanhi Regional Trial Court Branch 41 Presiding Judge Joeffre Acebido sa prohibition case ruling apan dili pa kini pinal.
Kini ang rason nga gipamugos usab niini nga anaa unta ang duha ka panig sa ‘status quo’ samtang modangop pa sila sa Court of Appeals aron moapelar sa hukom sa korte.
Sa pagkutlo ning balita, gikustodiya ni Cagayan de Oro City Police Director Col. Salvador Radam ang mga dokumento nga anaa sa posisyon ni Jarales gikan sa iyang opisina.
