CAGAYAN DE ORO CITY – Giduaw ni AFP chief of staff Gen Romeo Brawner Jr ang namatay’ng unom ka sundalo nga nakahaya sa 1st Infantry Division,Philippine Army headquarters sa Zamboanga del Sur kagahapong adlawa.
Personal gipaabot sa heneral ang iyang pasubo sa mga pamilya sa mga sundalo nga gika-engkuwentro sa 20 ka sakop sa Dawlah Islamiyah-Maute terror group sa Lanao del Norte.
Unang giila ang mga namatay nga sila Army Corporals Rodel Mobida;Rey Anthony Salvador;Reyland Tapinit;Private First Class Arnel Torneto;Army Private Michael John Lumingkit ug Army Private James Porras.
Samtang gitakda usab duawon sa heneral ang mga samaron nga sila Corporal Jaymart Timotigue;PFC Marvin Aguipo Army Private Ameril Saquinal ug Army Private Nazareno Rabido nga naa sa Camp Evangelista Station Hospital ning syudad karong adlawa.
Sa pikas bahin,giawhag ni Vice President ug DepEd Secretary Sara Duterte ang natl govt pinaagi sa security cluster nga seryosuhon ang pagbatok sa mga kalihukang terorismo sa nasud.
Kini human nasayran sa kalihim sa DepEd nga dunay pipila ka batan-on pa nga mga gitoohang terorista nga napatay sa decisive operation sa militar sa magkalahing bahin sa Lanao del Sur ug Lanao del Norte ning tuiga.
Maoy gitumbok ni Duterte ang pagkapatay sa 18 na ka sakop sa Dawlah Islamiyah- Maute diin sa operasyong-militar diin nasuta nga may pipila ka batan-on ang apil nga nakigbatok sa kagamhanan.
Samtang nasubo usab si Duterte nunot sa kamatayon sa unom ka sundalo ug upat samaron sa ulahing engkuwentro sa Brgy Ramain,Munai,Lanao del Norte sa miaging adlaw’ng Domingo.
