Kumpiyansa ang House prosecution nga igo ang ilang mga ebidensya aron mapamatud-an nga adunay pananagutan si Vice President Sara Duterte sa impeachment trial bisan unsay voting threshold sa Senate Impeachment Court.
Sumala ni kanhi Surigao del Norte Representative ug prosecution spokesperson Ace Barbers, klaro nga gipakita sa mga ebidensya nga gi-presentar sa prosecution ang ilang mga alegasyon sa upat ka Articles of Impeachment.
Apan, giingon ni Barbers nga ang Senate Impeachment Court gihapon ang magbuot kung unsay mahimong voting threshold ug mga lagda sa hearing.
Samtang, giingon ni 1-Rider Partylist Representative Rodge Gutierrez nga hisgutan pa sa prosecution panel ang ilang posisyon bahin sa voting threshold sa dili pa magsugod ang oral arguments nga nakatakda sa sunod semana.
