CAGAYAN DE ORO CITY-Namugos ang inahan sa lalaki nga unang nasikop sa pasangil nga pagpanglugos nga ‘frame up’ lamang ang gihimo sa kapolisan diha sa Zone 12-A,Hilltop, Upper Carmen sa syudad.
Kini human unang nasikop sa grupo ni Police Capt Mario Mantala,hepe sa Crime Against Persons and Property Desk o CAPPD si Anjermy Cuador nga nakapatong sa babaye nga gilugos niini.
Miingon ang inahan ni Anjermy nga si Carmelita Cuador nga imposible nga mahimo sa iyang anak ang salaod kay igo ra sila nag-estorya niini.
Namugos si Gng Cuador nga pugos nga gihubuan sa mga pulis ang suspek aron ipatoo nga gilugos niini ang babaye sulod sa kuwarto.
Una nang gibutyag ni Mantala nga nalugos na sa suspek ang biktima niadtong Pebrero 22 ug laraw unta kining utrohan kagabii.
