Gipadayon sa House Prosecution Panel, pinaagi kang Representative Renee Co, ang pagsusi sa dagkong “inflow” ug “outflow” sa kuwarta nga nakita sa mga report sa Anti-Money Laundering Council o AMLC, kalabot sa mga transaksiyon nga nalambigit kang Vice President Sara Duterte, iyang pamilya ug mga kauban.
Matud ni Co, tumong sa maong pagsusi nga masubay kung asa gikan ug asa padulong ang dagkong kantidad sa kuwarta, ug matubag ang mga pangutana bahin sa mga kabtangan nga gideklarar sa Bise Presidente.
Gitan-aw sa prosecution ang mga rekord sa pinansyal ug uban pang dokumento aron masabtan ang mga transaksiyon nga gi-flag sa AMLC ug mahibal-an kung aduna pay mga kantidad nga wala pa matubag o mahatagan og klarong katin-awan.
Gilauman usab nga makuha ang dugang nga impormasyon gikan sa AMLC, mga bangko, insurance firms ug Bureau of Internal Revenue o BIR aron mas makompleto ang ilang pagsusi sa maong mga transaksiyon.
Sumala sa prosecution, kabahin kini sa ilang pagpalawom sa pagsusi sa pinansyal nga kalihokan nga ilang giingong may kalabotan sa isyu sa “fitness to rule” ni Vice President Sara Duterte.
