CAGAYAN DE ORO CITY, Philippines – Nakurat ug mibati sa trauma si BTS member Jin human kini gihalokan sa iyang Japanese fan sa aping nga walay pagtugot.
Ang video sa insidente nahimong viral human kalit nga misaka sa stage ang gibana-bana 50 anyos nga ginang ug gidul-it ang iyang baba sa aping ni Jin.
Ang insidente nahitabo sa usa ka “hug event” nga gipahigayon sa labing sikat nga boyband sa South Korea niadtong Hunyo 13, 2024, sa Jamsil Indoor Stadium sa Seoul, usa ka adlaw human nakompleto ni Jin ang iyang mandatory military service.
Ang aksyon sa fan gibatikos sa daghang kritiko, ug ang mga pulis milusad og imbestigasyon human makadawat sa nagbaha nga mga reklamo gikan sa ubang mga fans.
Kagahapon, namahayag ang South Korean police sa Songpa station nga gipasumon nila ang Japanese national tungod sa nag-alinsuso nga petisyon sa mga fans sa BTS.
Gikonsiderar sa kapulisan nga lakip imbitaron si Kim Seok-jin, nga mas naila sa ngalang Jin, aron kuhaan sa iyang testamento.
