CAGAYAN DE ORO CITY – Walay lungkab kay kaugalingong buhatan ni interim COWD General Manager Fermin Jarales ang gisudlan sa upat ka personalidad nga naglakip sa city hall employee nga si Freeje Padinit.
Kini ang katin-awan ni Jarales sukwahi sa gipatoo sa ilang mga kritiko pinaagi sa uploaded video clip nga makita si Padinit nga dunay gihimo sulod sa buhatan sa COWD.
Miingon ang opisyal nga kanhi niya buhatan ang gipatrabaho ni Padinit isip IT expert ayha mibalhin sa general manager’s office nga temporaryong gipabakante ni regular COWD General Manager Engr Antonio Young.
Gibutyag ni Jarales nga personal niya nga kaila ug higala ang maong IT expert rason nga gikuha niya ang serbisyo niini igo paghuman sa trabaho sa city government.
Dugang niini nga dili tinood ang nagkatag nga mga estorya nga nagtangag sa video clip nga makita sa social media.
