CAGAYAN DE ORO CITY – Nanghimakak ang kadagkuan sa JOCAL688 Beauty and Wellness Products Trading Incorporated nga nalambigit sila sa pagpangilad sa mga tawo nga nagsilbi nila na mga miembro dinhi sa nasud ug abroad.
Miingon si Joshua Calderon,presidente sa kompanya nga tinood nga gi-kuwestiyon sa Security and Exchange Commission o SEC-Manila ang ilang operasyon apan natugtan sila’g balik sa operasyon kay nakit-an nga rehistrado kini ug wala malambigit sa investment scam.
Gihagit ni Calderon ang mga miembro nila nga dunay reklamo nga atubangon sila sa opisina aron giingong mahatagan sa katin-awan ang ilang gi-reklamo.
Samtang gikompirmar ni SEC-10 regional director Reynato Egypto nga gitugta’g balik ang kompanya ni Joshua Calderon nga maka-operate apan ubos sa pipila ka kondisyon.
Kini human lugwa-i sa SEC resolution nga bugtong mahimo sa iyang kompanya ang pagbaligya lamang sa ilang mga produkto ug gidili na ang pagpagpang-recruit sa dugang miembro ug ihunong na ang ‘buy and earn’ program.
Gibutyag ni Egypto nga aktibo pa ang CEASE and DESIST ORDER o CDO sa katibuk-an batok sa JOCAL688 nga naglihok dinhi sa syudad.
