Gipanghimakak ni Councilor Enrico Salcedo ang naglutaw nga pahayag sa social media nga nag-angkon nga dili na tugotan ang mga dili residente sa Cagayan de Oro City nga makasulod sa siyudad gamit ang ilang mga sakyanan.
Sa espesyal nga report ni Salcedo atol sa sesyon sa City Council niadtong Lunes sa hapon, iyang klarong gisaway ang maong impormasyon nga iyang gitawag nga sayop ug makalibog sa publiko.
Si Salcedo, nga maoy chairperson sa Committee on Public Utilities nga naglangkob sa Roads, Traffic Management, ug Energy, mipahayag nga walay kamatuoran ang maong post nga gimantala sa usa ka Facebook page nga ginganlan og “Barangay Outpost,” nga iyang gihulagway nga troll page.
Gipasabot usab sa konsehal nga adunay bahin sa iyang miaging interbyu nga sayop ang pagsabot sa pipila ka netizens. Matod niya, wala siya mag-awhag sa bisan kinsa nga magpakamatay pinaagi sa pag-ambak sa tulay.
Iyang gipatin-aw nga ang pulong nga “ambak” nga iyang gigamit usa lamang ka panultihon sa Binisaya nga nagpasabot og pagpawala sa kabug-at sa hunahuna o pagpahulay sa pangisip, ug dili kini may kalabutan sa pagdaot sa kaugalingon.
Gi-awhag ni Salcedo ang publiko nga magmatngon ug magpraktis og due diligence sa pagtan-aw sa impormasyon sa social media.
Gidasig niya ang katawhan nga mag-research, mag-fact check, ug mag-verify una sa dili pa motuo o magpaambit sa mga post, ilabi na nga paspas kaayo ang pagkatag sa tinuod ug bakak nga balita. (James Oliver)
