CAGAYAN DE ORO CITY- Gihataga’g ayudang pinansyal nga tag-tunga sa milyon ka pesos ug celphones ang mga kapikas sa 3 ka sundalo nga gibanhigan-patay sa rebeldeng New People’s Army o NPA sa Sitio Kaleb, Barangay Kibalabag, Malaybalay City, Bukidnon.
Kini human gibisita ni Pres Rodrigo Duterte ang haya sa 3 ka sundalo nga sila si Cpl Owen Yee,PFC Pat Non ug PFC Niño Christopher Talabor sa kapilya sa St Ignatius de Loyola sa Camp Evangelista sa syudad.
Gibutyag sa kapikas ni PFC Yee nga si Almalou Yee nga ihatag ni Pres Duterte ang hustisya alang sa gidangatan sa iyang bana ug laing duha ka kauban niini.
Samtang kayugot ang gihambin sa pamilya ni Talabor batok sa mga rebelde nga mibanhig kanila sa Bukidnon sa miaging semana.
Nahupay lamang ang gibati ni Gng Gricel Talabor sa dihang gipasalig ni Pres Rodrigo Duterte nga duol na nila nga makab-ot ang hustisya alang sa ilang mahal sa kinabuhi nga brutal napatay sa NPA.
Si Talabor kuyog si Janice Non nga kapikas usab si PFC Pat Non ang gitunulan gihapon sa tagtunga sa milyong cash assistance ug makadawat sa educational ug employment assistance gikan kang Duterte.
Samtang gitawag sa kapikas nga ni late Cpl Yee nga si Almalou nga demonyo ang mga rebeldeng New People’s Army o NPA.
Kini tungod kay gawas nga kapi’g 20 ang samad-pinusilan,diriyot usab maputol ang kamot ni Yee ug gibuak pa ang kinatawo niini.
Kini ang hinungdan nga sobra ang kasakit nga gibati ni Gng Yee sa gidangatang kamatayon sa bana niini.
Una usab niini,namahayag si Ka Allan Juanito nga nag-depensa lamang sila sa kaugalingon tungod sa pagbunot armas sa mga sundalo sa dihang gisitar nila samtang nagsakay sa mga motorsiklo.
Dugtong niini,gimanduan karon ni PNP regional director C/Supt Agripino Javier ang tanang kumander sa kapolisan nga mag-alerto batok ilusad nga pag-atake sa rebeldeng New People’s Army o NPA dinhi sa rehiyon.
Kini human gimando na ni Pres Rodrigo Duterte ang pagtubag sa bisan unsa nga atake nga himoon sa mga rebelde epekto sa pagkanselar sa peace negotiation ngadto sa CPP-NPA-NDF.
Miingon si Cagayan de Oro City Police Office o COCPO spokesperson C/Insp Mardy Hortillosa II nga molusad usab sila sa anti-insurgency operations aron matugaw ang dautang plano sa mga rebeldeng pundok.
