NAGPAKITA og dakong paglaum ang Social Action Center Archdiocese of Cagayan de Oro nga mapasar sa termino ni President Ferdinand Marcos Jr. ang Anti-Political Dynasty Bill human kini wala mahatagi og igong pagtagad sulod sa nagkalain-laing administrasyon sa miaging mga tuig.
Sumala sa Social Action Center coordinator nga si Bong Florendo, panahon na nga hatagan og konkretong lihok ang isyu sa political dynasty aron mapalig-on ang checks and balances sa gobyerno.
Giawhag usab sa grupo ang katawhan sa dakbayan nga motambong sa ipahigayon nga public consultation kabahin sa political dynasty nga pagahimoon sa Xavier University – Ateneo de Cagayan karong adlawa ug sa University of Science and Technology of Southern Philippines sa adlawng Biyernes.
Gidasig sa Social Action Center ang publiko nga mosalmot sa maong kalihokan, pabor man o dili pabor sa maong panukalang balaod, aron madungog ang nagkalain-laing baruganan sa komunidad.Matod pa ni Florendo, ang aktibong partisipasyon sa katawhan maoy usa sa yawe aron mapakita nga ang isyu sa political dynasty dili lamang concern sa mga politiko kundili sa tanang Pilipino. (James Oliver)
