Gipahibalo ni Atty. Jojo Lacalinao, convenor sa Duterte Panagutin Campaign Network, nga posibleng molungtad pa og pipila ka tuig ang imbestigasyon sa International Criminal Court (ICC) batok kang kanhi Presidente Rodrigo Duterte.
Matud sa abogado, dili dinalidali ang dagan sa hustisya sa maong korte tungod sa kakomplikado sa mga legal nga proseso ug sa pagsuta sa mga ebidensya.
Gipatin-aw usab ni Lacalinao nga ang mga hearing sa ICC dili ginapahigayon adlaw-adlaw, hinungdan nga mas mo-inat pa ang panahon sa paghulat sa pinal nga desisyon.
Subay sa kasaysayan sa ICC sa pagdumala og mga kaso batok sa mga kanhi lider sa nasud, nagkinahanglan gayod kini og mabinantayong pagsunod sa due process.
Bisan pa man sa gidugayon sa maong biyahe sa balaod, padayon ang paningkamot sa ilang network nga mapanubag ang angay manubag base sa kamatuoran. (jane abulag)
