Gilauman ang laing hugna sa Pagkunhod sa Presyo sa Petrolyo sunod semana! Basaha ang detalye sa pag-ubos sa presyo sa diesel, gasolina, ug kerosene.

Makalaom ang mga motorista sa laing hugna sa pagkunhod sa presyo sa mga produktong petrolyo sunod semana, diin gilauman nga moubos ang presyo sa diesel, gasolina ug kerosene.

Base sa lima ka adlaw nga trading sa internasyonal nga merkado gikan Nobyembre 16 hangtud 20, gibanabana nga mokunhod og ₱2.00 hangtud ₱3.00 matag litro ang presyo sa diesel ug gasolina, samtang gilauman nga mokunhod og ₱1.00 hangtud ₱2.00 matag litro ang kerosene.

Sa maong panahon, mikunhod sa internasyonal nga merkado ang presyo sa diesel og ₱2.99 matag litro, ang gasolina og ₱2.86 matag litro, ug kerosene nga miubos og ₱2.00 matag litro.

Bisan pa niini, banabana pa lamang ang maong mga kausaban ug gipaabot pa nga ipahibalo sa mga kompanya sa lana ang opisyal nga presyo sa Lunes nga ipatuman sa sunod nga adlaw. (raniel mahunyag)