CAGAYAN DE ORO CITY, Philippines – Kasado na ang gipanghinambog ni Fr. Robert Reyes nga lapad nga lihok protesta aron ipanawagan ang pag-abante sa reklamong impeachment batok kang Vice President Sara Duterte.
Si Reyes, kinsa maoy convenor sa Clergy for Good Governance, naninguha nga tambungan kini sa kinabag-ang katawhan nga mikastigo kang VP Sara dihang milyones nga salapi ang gipangawkaw niini sa gobyerno gamit ang Confidential ug Intelligence Fund sa Office of the Vice President, ug sa pondo gikan sa Department of Education, niadtong nagsilbing kining kalihim sa ahensya.
Ilusad ang rally sa Archdiocesan Shrine of Mary, Queen of Peace o mas naila isip EDSA Shrine sa bandang Ortigas Avenue, lungsod sa Quezon, karong Biyernes.
Una niini, sa gilusad nga press conference gipamugos sa pari nga sila non-partisan ug walay gipaluyuhan nga pulitiko.
Mahinumduman nga si Father Reyes, kinsa naila nga running priest, mipadayag niadto sa iyang pagsuporta sa mga kakampink ubos sa bando ni 2016 presidential aspirant Leni Robredo, ug sa pamilyang Aquino ubos sa administrasyon ni Benigno Noynoy Aquino III.
