Gi-aresto na sa United States Federal Bureau of Investigation (FBI) ang 18-anyos nga si Sheikhdoon Abdullahi Mohamud sa Richfield, Minnesota human milaraw kini nga mopalit sa AK-47 ug 200 ka bala gikan sa undercover agent nga nagpakaaron-ingnon nga miyembro sa ISIS.
Sumala sa piskal nga si U.S. Attorney Daniel Rosen, plano ni Mohamud nga atakehon ang Mall of America sa Oktubre 24 atol sa Hmong Arts Celebration.
Ang suspek dugay nang gi-imbestigahan sukad Disyembre 2024 ug gipakita sa iyang mga mensahe ang intensyon nga patyon ang mga dili Muslim.
Namugos ang FBI nga ang operasyon nakapugong sa posibleng pagpatay sa 30 hangtod 60 ka tawo.
Si Mohamud nailhan isip American-born citizen nga adunay kaliwat nga taga Somalia ug kaamtangang giatubang ang iyang kaso sa federal court sa St. Paul, Minnesota.
