CAGAYAN DE ORO CITY – Gibahad ni Gov Bambi Emano ug Sangguniang Panlalawigan o SP board member President Prexy Elipe nga kasuhan sila si Ernesto Molina ug kanhi Pelaez Sports Center General Manager Bong Cinco.
Kini human nagtoo ang duha ka opisyal nga nagpagamit sa politika sila si Molina ug Cinco aron ipiton ang pagdumala sa lalawigan.
Gihimo ni Emano ang panganti human gibasura sa Ombudsman ang patung-patong nga kasong kriminal ug administratibo tungod sa pribadong pagdumala sa sports center ubos sa Misamis Oriental Intergrated Sports Complex o MOISC.
Samtang miduso na’g motion for reconsideration o MR ang kampo ni Ernesto Molina aron subli kumbinsihon ang Ombudsman aron masilotan ang duha ka opisyal sa lalawigan.
Kini human nakurat si Molina ug nadismaya kon nganong gibasura sa Ombudsman ang mga kaso gipasaka batok sa duruha bisan sa kalig-on sa ilang giingong mga ebedensiya.
Miingon si Molina nga daghan pa sila’g legal options aron ipadayon ang pagpangita sa kaangayan ug katin-awan kabahin sa kontrobersyal nga pagdumala sa sports center.
Namugos si Molina nga walay politika sa iyang lakang sukwahi sa pasangil sa mga opisyal nga gipanumbong niini sa Ombudsman.
