Nasanta sa Police Regional Office 10 (PRO10) ang gibanabana nga ₱240,000 nga kantidad sa smuggled nga sigarilyo sa gilusad nga checkpoint operation sa Barangay Bansarvil I, Kapatagan, Lanao del Norte, kagahapon sa hapon.
Ang operasyon gipanguluhan sa 2nd Provincial Mobile Force Company (PMFC) uban sa Kapatagan Municipal Police Station ug SND Maritime Mobile Team.
Subay sa report, gipara sa kapulisan ang sakyanan nga Mazda Bongo kolor “orange” ug nadiskobrehan sa likod nga bahin ang unom ka sako sa New Far Red cigarettes, nga adunay sulod nga 50 ka reams matag sako.
Giila ang driver nga si alyas “Kali,” 27 anyos, taga-Salvador, Lanao del Norte, kauban ang duha ka pasahero – ang usa, nagpangidad sa 17 anyos ug ang laing pasahero walay trabaho, pulos residente sa Siraway, Zamboanga City.
Basi sa pamahayag sa mga suspek gikan pa sa Sultan Naga Dimaporo ang ilang kontrabando ug gitakda kining i-disposar sa Kapatagan.
Detenado na ang mga suspek sa Kapatagan Municipal Police Station, samtangang mga sigarilyo giturn-over sa Bureau of Customs (BOC) – Iligan City.
Gidayeg ni PBGEN Rolindo M. Suguilon, Regional Director sa PRO10, ang mga personnel sa maong kalampusan ug nanawagan sa publiko nga magpabiling mabinantayon ug mutabang sa pagreport sa mga ilegal nga kalihokan.
