CAGAYAN DE ORO CITY – Mapun-an na ang inadlaw’ng suhulan nga dawaton sa mga pribadong mamumuo nga nakabase dinhi sa Northern Mindanao epektibo ning adlawa.
Kini human nagpadumdom ang Regional Tripartite Wages and Productivity Board 10 sa pag-epekto sa 2nd tranche sa usbaw sa suhulan alang sa mga trabahante nga ubos sa agriculture ug non-agriculture sectors sa rehiyon.
Miingon si RTWBP 10 Board Secretariat Atty Verjel Walag nga anaa sa 15 pesos ang madugang sa category 1 & 2 sa non-agriculture sector hinungdang 405 pesos na ang ilang dawaton sugod sa sunod nga ting-suweldo.
Mahimo na usab nga 390 pesos per day ang category 3 & 4 sa mao gihapon nga sector gumikan sa aprobadong balaod niini.
Dugang ni Walag nga bisan ang agricultural sector nga anaa ang category 1 to 4 workers ang may usbaw nga 22 pesos nga mopatak na sa ilang payrolls.
Samtang kulang pa gihapon alang sa inadlaw nga galastuhan ang nadugang nga suhulan sa mga mamumu-o nga nakabase dinhi sa Northern Mindanao.
Kini maoy gipamugos ni ALU-TUCP Mindanao Vice President Nicanor Borja kabahin sa pag-epekto ning adlawa sa ikaduhang hugna sa usbaw sa suhulan nga ilang gipangayo gikan sa gobierno.
Miingon si Borja nga dili sila mohunong sa pagpangita’g dugang ikaayo sa mga yanong mamumu-o sanglit sobra ka taas ang inflation rate o presyo sa nag-una ug batakang palaliton sa mga merkado sa nasud.
Hisayrang ang grupo ni Borja ang nangunay pagduso sa wage increase petition sa DOLE 10,diin miani’g pag-uyon sa local employers dinhi sa rehiyon ning tuiga lamang.
