CAGAYAN DE ORO CITY – Lusot gilayon pinaagi sa executive budget deliberation ang 8.850 bilyones pesos nga tinuig nga pondo nga gamiton alang sa dakbayan sa tuig 2025.
Kini human ipatawag sa committee of the whole sa konseho nga gipanguluhan ni City Vice Mayor Jocelyn ‘Bebot’ Rodriguez ang tanang dept managers ni City Mayor Rolando ‘Klarex’ Uy aron tag-tagsa ipasabot kon nganong naghupot sila sa maong kadako sa pondo ug unsay mga prayoridad gamitan niini sunod tuig.
Sa maong kantidad nga target kuhaon sa dakbayan,7.6 bilyones pesos alang sa general fund ug laing 1.2 bilyones pesos usab sa Special Account -Local Economic Enterprises/Utilities.
Gilangkuban ang social service sector sa health,nutrition,hospital services ingon man social services and welfare nga gihataga’g pinakadako nga pondo 3.7 bilyones.
Gisundan usab kini sa general public sector nga dunay 2.8 bilyones pesos nga mosentro sa mga proyekto ug mga programa sa public safety and order sa dakbayan.
Gigahinan usab sa 2.3 bilyones pesos ang economic services sector diin makapahimulos niini ang infrastructure, agricultural services, environmental and natural resources ug operasyon sa kamerkadohan.
Hisayrang anaa lang sa 7 hangtod 8 porsiento ang usbaw sa budget sunod tuig gikan sa 2024 city annual budget.
