Gikasubo sa White House ang desisyon sa Vatikano nga ibasura ang sugyot nga mutambong sa Board of Peace ni United States President Donald Trump.
Namahayag si White House Press Secretary Karoline Leavitt nga daku unta ang matabang sa Santo Papa sa pagpalanog sa kalinaw ilabe sa mga nasud nga padayong nagkagubot gumikan sa linilogay sa teritoryo.
Mipasabot si Leavitt nga ang tumong sa inisyatibo ni Trump walay sagol pamulitika. Una niini, gipagawas sa opisina sa The Holy See ang tubag sa imbitasyon ni Trump kang Pope Leo XIV.
Gikompirmar ni Vatican secretary of state Cardinal Pietro Parolin nga dili manginlabot ang Simbahang Katolika sa inisyatiba sa board, tungod sa kuwestiyonable nga unod sa alyansa.
Wala na mikomento si Parolin sa report nga usa ang gobyerno sa Italya sa nagsuporta sa gitukod nga inisyatiba ni Trump, isip “observer”.
Hisayran nga anaa na sa 25 ka nasud nag mi-anunsyo sa ilang kaandam nga mahimong miyembro sa Board of Peace ni Trump.
