Dili angay makatungtong sa Pilipinas si United States President Donald Trump tungod sa dala niining krisis sa ekonomiya ug hulga sa seguridad sa mga Pilipino, matud ni Anakbayan Chairperson Ming Gomez.

Gipadayag ni Gomez nga ang mga giyerang agresyon ug polisiya ni Trump sa gawas sa nasud maoy hinungdan sa pagsaka sa presyo sa petrolyo ug mga nag unang palaliton nga nagpaantos sa mga drayber ug yanong lungsoranon.

Gitumbok usab sa lider sa kabataan ang mga war exercises nga gipaluyohan sa Amerika sa Luzon, Visayas, ug Mindanao nga nagresulta sa pagkawala sa panginabuhian sa mga residente ug pagpanghulog og bomba sa mga komunidad sa Negros ug Mindoro.

Dugtong pa ni Gomez nga ang presensya ni Trump atol sa ASEAN Summit naghatag lang og dalan sa mas grabeng pagpahimulos sa bahandi ug katawhan sa nasud.-