Gisugdan na ang proseso sa ‘conclave’ sa mga kardenales aron usa kanila ang pili-on aron mohulip sa namatay nga si Pope Francis pinaagi ilang pagbotar sulod sa Sistine Chapel sa Vatican.
Subay sa proseso, kinahanglang makakuhaa ang usa ka cardinal sa 2/3 votes gikan sa 133 ka cardinal electors aron mahingpit ang iyang pagka-santo papa.
Kung walay mapili sa sulod sa tulo ka adlaw, temporaryong ihunong una sa 133 ka cardinal electors ang conclave aron mapaubos sa pagpamalandong.
Nalatid usab nga sa matag-human sa botasyon, kini ipakita sa tibuok kalibutan pinaagi sa pagsunog sa gipanggamit nga balota diin sagulan sa kemikal nga adunay duha ka kolor nga angay bantayan sa katawhan.
Kini tungod kay kung ang mogawas nga aso gikan sa panghaw sa Sistine Chapel ang kolor puti na, nagpasabot nga kini nakapili na sila sa cardinal nga magsilbing santo papa ug midawat sa bug-at nga kaakuhan aron panguluhan ang simbahan.
Apan kung kolor itom ang molugwa sa panghaw,kini nagkahulugan nga subli pa sila mopili kay wala makuha ang 2/3 votes gikan sa 133 ka cardinals nga apil sa conclave.
Apil usab sa kasuguan nga kung kinsa kadtong mapili nga bag-ong santo papa,kinahanglang konsultahon una kini sa cardinal electors kung dawaton o dili ang iyang pagkapili.
Pasudlon usab kini sa ‘crying room’ aron mamalandong sa iyang sudlan nga dakong kaakuhan dii panguluhan ang 1.4 bilyon ka mga Katoliko sa tibuok kalibutan.
Namatay si Pope Francis sa edad 88 diin igo lang nakaabot sa kasaulugan sa Easter Sunday.
Sa pagka-Abril 21 sa buntag,hingpit gibiyaan niini ang iyang obligasyon sa kalibutan sulod sa gisak-an niya nga balay sa Casa Santa Marta sa Vaticano.
