CAGAYAN DE ORO CITY – Pagpihig sa katawhan nga masayod ang gihimong paspas pagpapalabang sa city annual budget alang sa dakbayan.
Kini ang komento ni kanhi City Mayor Oscar Moreno kon nganong tag-duha lang ka pangutana ang gitugot sa mayoriya sa konseho aron masusi ang naglangkob sa 8.8 billion pesos nga pasadong pondo sa tuig 2025.
Miingon si Moreno nga importante ang pagbaton sa tinuig nga budget apan sa kanunay angay unta kini nga sihag sa pagsusi sa katawhan aron dili mahimong kontra-demokrasya.
Siya miingon nga kontra-demokrasya na ang maong lakang kay limitado nga masayran sa katawhan ang padulngan sa pondo nga pangitaon alang sa sunod tuig.
Namahayag ang kanhi mayor nga higayon na unta kini sa Cagayan de Oro City Council nga ikapadayag sa katawhan ang nilangkuban sa pangayoong pondo ni City Mayor Rolando ‘Klarex’ Uy apan limitado ang pagkuti-kuti sa mga konsehales niini.
