Nag-usik-usik lang sa kahago ang mga drivers ug operators sa Northern Mindanao tungod sa walay konsensya nga administrasyon ni Presidente Ferdinand Marcos Jr.
Kini ang gipalanog nga kahingawa sa transport group nga grabeng naapektuhan sa “laban-bawi” nga direktiba sa presidente.
Si Northern Mindanao Federation of Transport Service Cooperative (NOMFEDTRANSCO) Chief Executive Officer (CEO)Luzminda Escobidal mipabati sa ilang tumang pagkadismaya sa kasamtangang desisyon nga gipakanaug ni Marcos kay tataw nga wala dungga ang ilang petisyon ug bug-at na kaayo sa ilang bulsa ang magbayad sa taas nga presyo sa lana nga itubil sa ilang mga sakyanan samtang ang pletihan walay pag-irog.
Hugot ang pagtuo sa ilang grupo nga wala masabti ni Presidente Marcos ang ilang sentimiento ug sakripisyo aron ipadayon ang pamasada taliwala nga buslot na ilang mga bulsa.
Gumikan niini, taas ang pagduda sa grupo nga magkalisud si Marcos sa pagsuspenso sa oil deregulation law ug excise tax kay wala na siyag madawatan ug isulod sa maleta.
