CAGAYAN DE ORO CITY – Dili matukib ang gibating kalipay sa mga Agustinong pari nga nakabase sa Pilipinas nunot sa katudluan ni kanhi Cardinal Robert Francis Provest isip ika-267 nga santo padre sa simbahang Katoliko.
Kini ang gipalanog ni Rev. Fr Jules Almerez,Order of Saint Augustine o OSA sa Basillica Menore Del Santo Niño sa Cebu kabahin sa pagpangulo ni Papa Leon de katorse sa sa halos 1.5 bilyon ka mga debotong Katoliko sa tibuok kalibutan.
Miingon si Almerez nga dako nila nga kadasig nga gikan sa ilang hugpong ang nahatagan sa higayon nga dumalahon ang simbahang Katoliko pinaagi kang Papa Leon.
Gihinaut usab nila nga unta ipalig-on pa sa bag-ong santo papa ang mga nasugdang mga reporma sa nasundan niini nga santo papa.
Dugtong niini,mohimo sa misa-pasalamat ang Filipino community nga nakabase sa Chicago,USA.
Kini ang tipik sa nauyunan sa mga Pinoy nga nanimuyo sa maong estado diin naggikan si Pope Leon XIV.
Miingon si Bombo International News Correspondent Randy Famacion nga dili usab matugkad ang gibati nila nga kalipay nga gikan sa Amerika ang mangulo sa simbahang Katolika sa tibuok kalibutan.
Siya miingon nga mibati na usab sila’g kahinam sa mahimong resulta sa gitakdang panagtagbo ni Pope Leon XIV ug US Pres Donald Trump.
