CAGAYAN DE ORO CITY – Gisupak sa Philippine Veterans Investment Development Corp. (Phividec) Industrial Authority ang bahad ni Misamis Oriental 2nd District Rep. Juliette Uy nga bungkagon ang ilang kompaniya tungod sa ilang gihimong pagpasagad hinungdan nga nakasulod ang mga basura gikan sa South Korea, Australia ug Hongkong.
Si Phividec administrator Franklin Quijano miingon nga dili sila angayang basolon kung nganong nakasulod sa Mindanao International Container Terminal (MICT) port ang mga kontrobersyal nga kargamento sa basura sa Misamis Oriental ilabina nga ang tanang international access areas ang adunay bahad sa smuggling.
Dugang pa niini, makaggawas lang ang tanang mga goods sa pantalan kun ugaling adunay approval sa Bureau of Customs o BoC ug wala kanila ang kontrol.
Samtang, gihangyo ni Quijano ang mga sakop sa media nga tabangan sila pag-promotar sa kamahinungdanon sa industrialisasyon sa usa ka lugar.
Siya miingon nga dako kini’g ikatabang sa kalambuan sa ekonomiya ug maghatag sa daghang trabaho.
Ang panawagan gihimo ni Quijano nunot na sa pahayag ni Misamis Oriental 2nd District Rep. Juliette Uy nga immediate resignation ni Quijano ug mga kauban niini nga opisyal sa maong kompaniya.
Nagbahad pa ang opisyal nga kun ugaling magmagahi ang mga taga Phividec nga mag-resign, mapugos siya nga himoong piso ang budget sa Phividec ug mag-file sa sugyot-balaodnon nga mag-abolish sa maong kompaniya.
