Walay nakitang maayong bunga ang grupo sa mga magtutudlo sa taas nga panahon nga pakighigalaay sa Pilipinas ug Estados Unidos tungod kay wala gayud hatagi og higayon ang nasud nga molambo.
Gipunto ni Alliance of Concerned Teachers Northern Mindanao Coordinator Roland Cruz nga nagpabilin lang nga labayanan sa mga sobrang produkto ug second hand nga gamit gikan sa Amerika ang Pilipinas imbes tugotan nga makatukod og kaugalingong industriya.
Gipasabot ni Cruz nga naglisod ang pag uswag sa ekonomiya sanglit ang mga lider sa nasud padayon lang nga nagsalig ug nagpailalom sa dikta sa Estados Unidos.
Giklaro sa lider sa mga magtutudlo nga magpabiling kabus ang mga Pilipino kon dili undangon ang maong sistema nga naghimo lang sa nasud isip ekstensyon sa merkado sa mga Amerikano.








