CAGAYAN DE ORO CITY – Nakabalik nga malipayon sa iyang kaugalingong pamilya ang Tagoloanon nga natanggong ug napriso sa pila ka bulan samtang nanarbaho isip overseas Filipino worker sa Malaysia.
Kini human midangop ang iyang pamilya sa buhatan ni Misamis Oriental 2nd District Cong. Bambi Emano aron magpatabang nga makauli ang padre de pamilya nga si Marcelino Tanduyan Lasan,51 anyos nga taga-Brgy Natumolan gikan sa iyang panarbaho nga naabtan paghupas sa iyang pasaporte sa maong nasud.
Napasayon ang pag-proseso sa papeles pagbalik ni Lasan sa Pilipinas kay gisampit usab sa kongresista ang tabang sa Overseas Workers Welfare Administration ug Department of Migrant Workers.
Miagi pa’g pagkabilanggo si Lasan sugod Setyembre 8 hangtod Nobyembre 19 kay naabtan nga mihupas ang gahom sa iyang pasaporte epekto sa pandemya sa COVID-19 tuig 2022.
Gipasugat ni Emano sa iyang congressional staff kuyog ang igsoon niini nga si Restituta Lasan-Lampago sa paghidangat sa Laguindingan Airport aron personal mahatod sa ilang pinuy-anan sa Tagoloan kagahapong adlawa.
Kini na ang ikaduhang higayon nga adunay OFW nga natabangan ang kongresista nga makabalik sa ilang pamilya kay nakasugat sa mga problema sa pagpanarbaho sa abroad.
Nanganti si Emano nga kanunay’ng motabang sa OFWs nga mag-atubang sa suliran samtang nanarabaho sa gawas kay sayod kini kon unsa kalisod ang madistansya sa pamilya aron makahatag sa kaarangan sa mga sakop sa pamilya dinhi sa nasud. (Photo: Mike Beja).
