CAGAYAN DE ORO CITY – Giklaro ni PNP Chief Gen Dionardo Carlos nga dili target sa pagpamusil sa mga sekyu si presidential candidate Leodegario ‘Ka Leody’ de Guzman samtang kuyog niini ang tribung Manobo pagsulod sa luna sa yuta sa Purok 18,Brgy Kiantig,Quezon,Bukidnon.
Kini sukwahi sa unang mikatag nga mga report nga si Ka Leody ang tuyo sa maong shooting incident nga miangol sa upat ka sibilyan sa Martes sa buntag.
Gibutyag ni Carlos nga dili usab makonektar sa politika ang hitabo kay igo ra gikuyugan ni De Guzman ang mga lumad pagkuha sa yuta nga giabangan sa Kiantig Devt Corporation apan nag-resulta sa pagpamusil.
Samtang dili na kinahanglang ipaubos sa kontrol sa Commission on Elections o Comelec ang lungsod sa Quezon,Bukidnon.
Kini bisan kon diriyot mabutang sa peligro ang kinabuhi ni presidential candidate Leodegario ‘Ka Leody’ de Guzman.
Gibutyag ni Police Regional Office 10 Director Brig Gen Benjamin Acorda Jr nga kontrolado sa security forces ang sitwasyon sa Bukidnon ug dili na malangan ang pagtumbok sa mga responsable sa maong kremin.
Gani,mismo si Bukidnon PNP Provincial Director June Mark Lagare ang iyang gitahasang mangunay pag-imbestigar sa gikinanhanglang mga impormasyon aron mapadali ang pagsulbad sa hitabo.
