CAGAYAN DE ORO CITY – Gipangita sa kapolisan ang tulo ka tawo nga responsable pagpusil-patay sa police asset batok sa mga kalihukan sa ilegal nga droga diha sa Brgy Camaman-an ning syudad kagabii.
Giila ni Cogon Police Station commander Police Capt. Abdul Armama ang biktima nga si Bryan Dave Pagara,36 anyos,may kaipon ug nagpuyo sa maong brgy.
Sa inisyal nga imbestigasyon,tulo ka lakaki ang miduol sa biktima ug paglabay sa pipila ka minutos sunod-sunod nga mga buto na sa gitoohang kalibre 45 nga armas ang nabati sa crime scene.
Sa pagsusi sa mga personahe sa Scene of the Crime Operatives o SOCO 10,dunay igo sa ulo ug ubang bahin sa lawas ang biktima nga hinungdan sa kamatayon niini.
Nasuta nga tipik sa gitumbok nga mipatay sa biktima ang suspek nga si alyas Malot kinsa nadakpan na usab kaniadto tungod sa pagpayuhot sa ilegal nga droga.
Sa pagsilbing asset usab sa biktima,nakuha gikan sa iyang patay’ng lawas ang sachet sa gitoohang shabu kagabii.
Gitoohan sa kapolisan nga pagdumot ang nag-unang motibo sa mga suspek ngadto sa gipatay’ng biktima.
