Gikuwestiyon sa senado ang unang gisugyot nga badyet sa National Irrigation Administration para sa tuig 2027 nga nagkantidad og P233.85 Billion.
Matud ni Commitee on Agriculture ug Food and Agrarian Reform Chairperson Senator Francis “Kiko” Pangilinan, ngano gapangayo sa dako kaayong badyet ang maong ahensya ug nakasiguro ba usab sila nga aprubahan ang maong sugyot.
Matud usab ni Senador Imee Marcos, impraktikal ang maong sugyot tungod kay wala pa magasto sa maong ahensya ang ilang badyet para niadtong tuig sa 2026, diin aduna pay halos P17 billion nga continuing appropriations niini.
Isip tubag, gitin-aw ni NIA Administrator Eduardo Eddie Guillen nga repleksiyon lamang kini sa grabeng panginahanglan sa sektor ug gikonsidera usab sa ilang ahensya ang mga hangyo sa Regional Development Councils (RDC) maong nidako pag-ayo ang kantidad kumpara sa orihinal nga gisugyot nila.
Hisayran nga ang P47.43 Billion lamang ang gitagana nga badyet sa NIA para sa tuig 2027, diin 26 porsiyento ang gi-ubos niini kung itandi sa P64.37 Billion nga gitaganang badyet niini. para sa kasamtangang tuig. (RANIEL MAHUNYAG)
