Nagpasidaan ang progresibong grupo nga Bagong Alyansang Makabayan nga posibleng gamiton sa Estados Unidos ug sa mga kaalyado niini ang proyekto nga Pax Silica aron mas pakusgan pa ang presensya sa mga tropang Amerikano dinhi sa Pilipinas.

Gipunting ni BAYAN Representative Rauf Sissay nga ubos sa administrasyon ni Pangulong Ferdinand Marcos Junior, tataw ang pagdaghan sa mga Enhanced Defense Cooperation Agreement o EDCA sites nga miabot na karon sa 9 gikan sa kanhi 5 lang ka base militar.

Nakita usab ni Sissay nga matag tuig nagkadako ang ihap sa mga sundalo nga mosalmot sa Balikatan military exercises diin daw gihimo na lang nga dulaanan ug natad sa gubat ang teritoryo sa nasud.

Nagtuo ang progresibong alyansa nga ang maong mga kalihukan usa ka dayag nga probokasyon nga makapasamot lang sa tensyon tali sa Estados Unidos ug China.