CAGAYAN DE ORO CITY, Philippines – Dismayado ang Commission on Human Rights sa taras nga gipakita sa mga miyembro sa Kingdom of Jesus Christ (KOJC) Church members dihang ilang giharas ang gipadala nga representante didto sa Davao City.
Mitug-an si Beda Epres, CHR Commissioner ug Spokesperson, nga nasaypan sa simbahan ang ilang babayeng delegado isip abogado sa PNP.
Hinoon, nasabtan sa komisyon ang gibati nga kalagot sa mga supporters ni Pastor Apollo Quiboloy, busa gipalabay na lang niya ang maong hitabo, ug mi-abante sa pagsuta sa matuod nga hitabo sulod sa compound.
Mipasabot si Epres nga unta mahupay na ang tensyon sulod sa KOJC dihang buhing saksi sa nag-alinsoso nga kaguliyang ang ilang gipadala nga representante gikan sa CHR-XI.
Panawagan ni Epres sa mga supporters sa Pastor Apollo Quiboloy nga musurrender na aron makahatag siyag katin-awan sa mga kaso nga gisang-at kaniya.
Gi-apelar usab sa CHR ang kapulisan nga mupatuman lamang sa arrest warrant, human mihungaw sa mga balita ang ilang pagguba sa mga pasilidad sa simbahan, bisan wala silay dala nga search warrant.
Sa pikas bahin, gikompirmar sa CHR nga dugang abogado ug special investigators ang ilang gipadala sa Davao City Police Office (DCPO) aron sutaon ang kahimtang sa KOJC members nga napaslak sa ilang prisohan.
