Napasaka na ang kasong robbery with homicide batok sa 17-anyos nga suspek nga giingong responsable sa pagpatay sa City Health Officer sa Gingoog City, si Downey Reyes Valdevilla Jr., 54 anyos. Kini ang gipahibalo ni Police Captain Geraldine Botanas, tigpamaba sa Misamis Oriental Provincial Police Office (MOPPO), sa interbyu sa Bombo Radyo. Gikompirmar sa kapulisan nga mitahan ang menor de edad tungod sa konsensya, ug narekober sa iyang posisyon ang mahalong cellphone sa biktima ug ang pitaka nga wala na’y sulod. Mahinumduman nga ang insidente nahitabo niadtong Nobyembre 15 sa Barangay Solana, Jasaan, Misamis Oriental, diin nakit-an ang lawas sa biktima nga nagbuy-od sulod sa Hyundai Starex van nga kolor bulawan, nga nakaparada sa daplin sa national highway. Nakatabang ang CCTV footage sa pag-ila sa suspek nga usa ka car wash attendant. Mitug-an ang suspek nga iyang gipatay si Valdevilla tungod kay wala siya bayri sa ilang transaksyon. Padayon ang imbestigasyon aron masuta ang tibuok detalye sa krimen.
