CAGAYAN DE ORO CITY – Nag-atubang na sa kasong criminal ang maglive-in partner ug ilang kauban sa pagsupak sa Republic Act No. 5207 o “Atomic Energy Regulatory and Liability Act of 1968 sa magkalahing piskalya sa kauluhan ingon man dinhi sa syudad.
Kini human unang gilusad sa National Bureau of Investigation ang entrapment operation batok kang Mae Vergel Zagala sa Pasay City diin nakompiskar ang inisyal 20 kilos sa metal bars ug laing 3 kilos nga black powder nga positibo nga uranium chemical.
Nasikop usab ang kaabag ni Zagala nga si Arnel Santiago diin sila gipang-detiner sa NBI.
Miingon si NBI investigator Atty Zulikha Conales- Degamo nga sa ilang gihimong follow up operation,nadakpan na usab nila ang partner ni Mae nga si Roy Vistal sa Brgy Gusa nga nagbaton sa susamang mga kontrabando.
Katapusang gidalikyatan sa NBI operatives ang laing pinuy-anan sa mga suspek sa Cebu City diin dugang uranium materials ang nakompiskar.
Tungod sa maong kasupakan,gipangkasuhan ang mga dinakpan apan duha kanila ang temporaryo nang gawasnon kay nakaduso’g piyansa sa korte.
Pagsaysay pa niini nga matag-kilo sa uranium,anaa sa 6.8 milyonees pesos ang kantidad.
Una nang gitug-an sa NBI nga anaa sa 100 kilos sa uranium materials ang nakompiskar nga hawid na sa Philippine Nuclear Research Institute.
Dugtong niini,dili lang peligro nga magamit sa paghimo’g bomba sa mga terorista ang nakompiskar nga uranium materials apan dakong bahad usab kini sa panglawas sa publiko.
Gibutyag ni PNRI Director Dr.Carlo Arcilla nga delikado usab sa sakit nga kanser kon makapaduol ang tawo sa maong klase sa kemikal.
Kini ang rason nga dili basta-bastang itugot ang paghupot sa tawo sa maong klase sa minerals kay naghatag usab kini sa dakong peligro sa kaluwasan sa katawhan.
Ang uranium magamit sa pagbaton sa koryente apan sagad usab kini gamiton sa nuclear weapons.
