Tugotan matud pa ni Senate Finance Committee Chairperson Joseph Victor “JV” Ejercito ang pagtambong sa mga representante sa civil society organizations (CSOs) isip tigpaniid sa deliberasyon sa sugyot nga 7.2 trilyon nga nasudnong badyet sa bicameral conference committe.
Sunod kini sa gipahigayon pagdungog sa Senate Finance Committee niadtong Oktubre 26 kauban ang mga CSO, diin nagpasidaan People’s Budget Coalition (PBC) mahitungod sa kapin sa 1 trilyon pesos nga kantidad sa mga kadudahang alokasyon o red flags sa nasudnong badyet.
Matud ni Ejercito, makatabang ang pagbaton og mas daghang tigpaniid aron matino ang mga proyekto nga wala niagi sa igo nga pagsusi ug ang mga posibleng katapusang minutong dugang sa sugyot nga badyet.
Dugang pa ni Ejercito, ibutang usab sa website sa Senado ang mga digital tool nga gibuhat sa CSO alang sa pagsusi sa mga dokumento sa badyet ug matino ang mga kuwestiyonable nga alokasyon.
Mipahayag ang senador nga himoon nila ang maong lakang aron mas sayon nga masusi sa mga ordinaryong Pilipino kung asa napadulong ang pondo sa nasud. (raniel mahunyag)
