Hingpit nga gikundena sa Samahan ng Progresibong Kabataan o SPARK pinaagi ni Milo Basuel ang gihimong pagbabag sa pipila ka dagkong kompanya sa gipatuman nga ₱85 nga pagtaas sa suholan sa National Capital Region.
Pinaagi sa giduso nga Temporary Restraining Order o TRO sa nagkadaiyang sanga sa Regional Trial Court sa Pasig ug Navotas, wala nadawat sa mga mamumuo ang gitakda nga ₱35 nga unang bahin sa maong wage hike sa niaging kinsenas.
Atubangan sa maong lakang, gipadayag sa representante nga usa kini ka dako nga tamparos sa nawong sa mga mamumuo taliwala sa padayong pagtaas sa presyo sa mga palitonon sama sa pagkaon ug petrolyo.
Tungod niini, gisaway sa grupo ang gihimo sa mga negosyo sama sa R2 Builders, Redicon Trading, ug APFFF tungod sa paghikaw sa husto nga suholan ug pagdumili sa pagtuman sa ilang responsibilidad sa mga trabahante.
